(1.11)
ayaneṣu ca sarveṣu yathā-bhāgam avasthitāḥ |
bhīṣmam evābhirakṣantu bhavantaḥ sarva eva hi ||
śrīdharaḥ : tasmād yuṣmābhiḥ sāvadhānair bhavitavyam ity āha—ayaneṣu vyūha-praveśa-mārgeṣu yathā-bhāgaṁ vibhaktāṁ svāṁ svāṁ raṇa-bhūmim aparityajyaiva avasthitāḥ santaḥ sarve bhīṣmam eva abhito rakṣantu yathānyair yudhyamānaḥ pṛṣṭhataḥ kaiścin na hanyeta | bhīṣma-balenaivāsmākaṁ jīvitam iti bhāvaḥ ||11||
madhusūdanaḥ : sama-rasam ārambha-samaye yodhānāṁ yathā-pradhānaṁ yuddha-bhūmau pūrvāparādi-dig-vibhāgenāvasthiti-sthānāni yāni niyamyante, tāny atra āyanāny ucyante | senāpatiś ca sarva-sainyam adhiṣṭhāya madhye tiṣṭhati | tatraivaṁ sati yathā-bhāgaṁ vibhaktāṁ svāṁ svāṁ raṇa-bhūmim aparityajyāvasthitāḥ santo bhavantaḥ sarve’pi yuddhābhiniveśāt purataḥ pṛṣṭhataḥ pārśvataś cānirīkṣamāṇaṁ bhīṣmaṁ senāpatim eva rakṣantu | bhīṣme hi senāpatau rakṣite, tat-prasādād eva sarvaṁ surakṣitaṁ bhaviṣyatīty abhiprāyaḥ ||11||
viśvanāthaḥ : tasmād yuṣmābhiḥ sāvadhānair bhavitavyam ity āha—ayaneṣu vyūha-praveśa-mārgeṣu yathā-bhāgaṁ vibhaktāḥ svāṁ svāṁ raṇa-bhūmim aparityajyaiva avasthitā bhavanto bhīṣmam eva abhitas tathā rakṣantu yathānyair yudhyamāno’yaṁ pṛṣṭhataḥ kaiścin na hanyate | bhīṣma-balenaivāsmākaṁ jīvitam iti bhāvaḥ ||11||
baladevaḥ : "athaivaṁ mad-ukti-bhāvaṁ vijñāyācāryaś ced udāsīta, tadā mat-kārya-kṣatiḥ" iti vibhāvya tasmin sva-kārya-bhāram arpayann āha—ayaneṣv iti | ayaneṣu sainya-praveśa-vartmasu yathābhāgaṁ vibhaktāṁ svāṁ svāṁ yuddha-bhūmim aparityajya avasthitā bhavanto bhavad-ādayo bhīṣmam evābhito rakṣantu, yuddhābhiniveśāt pārśvataḥ pṛṣṭhataś cāpaśyantaṁ taṁ yathānyo na vihanyāt, tathā kurvantv ity arthaḥ | senāpatau bhīṣme nirbādhe mad-vijaya-siddhir iti bhāvaḥ |
ayam āśayaḥ—bhīṣmo’smākaṁ pitāmahaḥ | bhavāṁs tu guruḥ | tau yuvām asmad-ekānta-hitaiṣiṇau viditau, yāv akṣa-sadasi mad-anyāyaṁ vidantāv api draupadyā nyāyaṁ pṛṣṭau nāvocatām | mayā tu pāṇḍaveṣu pratītaṁ snehābhāsaṁ tyājayituṁ tathā niveditam iti ||11||