(1.24-25)
evam ukto hṛṣīkeśo guḍākeśena bhārata |
senayor ubhayor madhye sthāpayitvā rathottamam ||
bhīṣma-droṇa-pramukhataḥ sarveṣāṁ ca mahīkṣitām |
uvāca pārtha paśyaitān samavetān kurūn iti ||
śrīdharaḥ : tataḥ kiṁ vṛttam ? ity apekṣāyāṁ sañjaya uvāca—evam ukta ity-ādi | guḍākā nidrā, tasyā īśena jita-nidreṇa arjunena evam uktaḥ san | he bhārata, he dhṛtarāṣṭra ! senayor madhye rathānām uttamaṁ rathaṁ hṛṣīkeśaḥ sthāpitavān | bhīṣma-droṇa iti mahīkṣitāṁ rājñāṁ ca pramukhataḥ sammukhe rathaṁ sthāpayitvā, "he pārtha ! etān kurūn paśya" iti śrī-bhagavān uvāca ||24-25||
madhusūdanaḥ : evam arjunena prerito bhagavān ahiṁsā-rūpaṁ dharmam āśritya prāyaśo yuddhāt taṁ vyāvartayiṣyatīti dhṛtarāṣṭrābhiprāyam ālakṣya, tan-nirācikīrṣuḥ sañjayo dhṛtarāṣṭraṁ pratyuktavān ity āha vaiśampāyanaḥ | he bhārata ! dhṛtarāṣṭra ! bharata-vaṁśa-maryādām anusandhāyāpi drohaṁ parityaja jñātīnām iti sambodhanābhiprāyaḥ | guḍākāyā nidrāyā īśena jita-nidratayā sarvatra sāvadhānenārjunena evam ukto bhagavān "ayaṁ mad-bhṛtyo’pi sārathye māṁ niyojayati" iti doṣam āsajya nākupyat, na vā taṁ yuddhān nyavartayat, kintu senayor ubhayor madhye bhīṣma-droṇa-pramukhataḥ tayoḥ pramukhe saṁmukhe sarveṣāṁ mahīkṣitāṁ ca saṁmukhe | ādy-āditvāt sārva-vibhaktikas tasiḥ | ca-kāreṇa samāsa-niviṣṭo’pi pramukhataḥ-śabda ākṛṣyate | bhīṣma-droṇayoḥ pṛthak-kīrtanam atiprādhānya-sūcanāya | rathottamam agninā dattaṁ divyaṁ rathaṁ bhagavatā svayam eva sārathyena adhiṣṭhitatayā ca sarvottamaṁ sthāpayitvā hṛṣīkeśaḥ sarveṣāṁ nigūḍhābhiprāyajño bhagavān arjunasya śoka-mohāv upasthitāv iti vijñāya sopahāsam arjunam uvāca—he pārtha ! pṛthāyāḥ strī-svabhāvena śoka-moha-grastatayā tat-sambandhinas tavāpi tadvattā samupasthiteti sūcayan hṛṣīkeśatvam ātmano darśayati | pṛthā mama pituḥ svasā tasyāḥ putro’sīti sambandhollekhena cāśvāsayati | mama sārathye niścito bhūtvā sarvān api samavetān kurūn yuyutsūn paśya niḥśaṅkatayeti darśana-vidhy-abhiprāyaḥ | ahaṁ sārathye’tisāvadhānas tvaṁ tu sāmpratam eva rathitvaṁ lakṣyasīti kiṁ tava para-senā-darśanena ? ity arjunasya dhairyam āpādayituṁ paśyety etāvat-paryantaṁ bhagavato vākyam, anyathā rathaṁ senayor madhye sthāpayāmāsety etāvan-mātraṁ brūyāt ||24-25||
viśvanāthaḥ : hṛṣīkeśaḥ sarvendriya-niyantāpy evam ukto’rjunenādiṣṭaḥ | arjuna-vāg-indriya-mātreṇāpi niyamyo’bhūd ity aho prema-vaśyatvaṁ bhagavata iti bhāvaḥ | guḍākeśena guḍā yathā mādhurya-mātra-prakāśakāḥ, tat tathā svīya-sneha-rasāsvāda-prakāśakā akeśā viṣṇu-brahma-śivā yasya, tena a-kāro viṣṇuḥ, ko brahmā, īśo mahā-devaḥ | yatra sarvāvatāri-cūḍāmaṇīndraḥ svayaṁ bhagavān śrī-kṛṣṇa eva premādhīnaḥ sann ājñānuvartī babhūva | tatra guṇāvatāratvāt tad-aṁśāḥ viṣṇu-brahma-rudrāḥ katham aiśvaryaṁ prakāśayantu ? kintu sva-kartṛkaṁ sneha-rasaṁ prakāśyaiva svaṁ svaṁ kṛtārthaṁ manyanta ity arthaḥ | yad uktaṁ śrī-bhagavatā para-vyoma-nāthenāpi—dvijātmajā me yuvayor didṛkṣuṇā [bhā.pu. 10.89.59] iti | 
yad vā, guḍākā nidrā, tasyā īśena jita-nidreṇety arthaḥ | atrāpi vyākhyāyāṁ sākṣān māyāyā api niyantā yaḥ śrī-kṛṣṇaḥ, sa cāpi yena premṇā vijitya vaśīkṛtaḥ, tenārjunena māyā-vṛttir nidrā varākī jiteti kiṁ citram ? iti bhāvaḥ | bhīṣma-droṇayoḥ pramukhataḥ pramukhe sammukhe sarveṣāṁ mahīkṣitāṁ rājñāṁ ca | pramukhataḥ iti samāsa-praviṣṭe’pi pramukhataḥ-śabda ākṛṣyate ||24-25||
baladevaḥ : tataḥ kiṁ vṛttam ? ity apekṣāyāṁ sañjayaḥ prāha—evam iti | guḍākā nidrā, tasyā īśaḥ sva-sakha-śrī-bhagavad-guṇa-lāvaṇya-smṛti-niveśena vijita-nidras tat-parama-bhaktaḥ | tenārjunena evam uktaḥ pravartito hṛṣīkeśas tac-citta-vṛtty-abhijño bhagavān senayor madhye bhīṣma-droṇayoḥ sarveṣāṁ ca mahīkṣitāṁ bhū-bhujāṁ ca pramukhataḥ sammukhe rathottamaṁ agnidattaṁ rathaṁ sthāpayitvā uvāca "he pārtha ! samavetān etān kurūn paśya" iti | pārtha-hṛṣīkeśa-śabdābhyām idaṁ sūcyate—"mat-pitṛ-svasṛ-putratvāt tvat-sārathyam ahaṁ kariṣyāmy eva | tvaṁ tv adhunaiva yuyutsāṁ tyakṣyasīti kiṁ śatru-sainya-vīkṣaṇena ?" iti sopahāso bhāvaḥ ||24-25||